नोभाक जोकोभिच फ्रेन्च ओपन टेनिसको क्वाटरफाइनलबाटै बाहिरिए

काठमाडौं, जेठ २३ । सर्वियन टेनिस स्टार नोभाक जोकोभिच फ्रेन्च ओपन टेनिसको क्वाटरफाइनलबाटै बाहिरिएका छन् ।

गएराति भएको खेलमा ईटालीका मार्को चेकिनातोसँग पराजित हुँदै जोकोभिच फ्रेन्च ओपनबाटै बाहिरिएका हुन् ।

विश्व वरियतामा ७२ औं स्थानमा रहेको ईटालीयन खेलाडी चेकिनातोले जोकोभिच विरुद्धको खेल ६-३, ७-६, १-६ र ७-६ ले जिते ।

जितसँगै चेकिनातोले अष्ट्रियाका डोमिनिक थियाम विरुद्धको सेमिफाइनल भिडन्त तय गरेका छन् ।

यसको अर्थ फ्रेन्च ओपन टेनिसमा यसपटक कम्तिमा एक जना खेलाडीले पहिलो पटक फाइनल खेल्ने पक्का भएको छ ।

जर्मनीका अलेक्जेण्डर भेरेभलाई सोझो सेटमा हराउँदै थियाम सेमिफाइनलमा पुगेका हुन् ।

फ्रेन्च ओपन टेनिसको महिलातर्फ अमेरीकाकी स्लोआनी स्टेफेन्स र म्याडिसन किज सेमिफाइनलमा पुगेका छन् ।

क्वाटरफाइनलमा रुसकी डारीया कासात्किनालाई ६-३ र ६-१ ले हराउँदै स्टेफेन्स तथा काजखस्तानकी युलिया पुटिनसेवालाई ७-६ र ६-४ ले हराउँदै किज सेमिफाइनलमा पुगेका हुन् ।

सुनसरीमा जंगली हात्तीको आतंक

इनरुवा, जेठ २३ । सुनसरीको कोशी गाउँपालिकामा जंगली हात्तीको आतंक बढेको छ ।

केही दिनयता कोशी टप्पु वन्यजन्तु आरक्षबाट निस्कने जंगली हात्तीले स्थानीयवासीको घरबालीमा क्षति पुर्‍याउने गरी आतंक मच्चाउन थालेको स्थानीयवासी चन्दन मगरदैताले जानकारी दिए ।

रातिको समयमा दैनिकजसो कोशी टप्पु वन्यजन्तु आरक्षबाट निस्केर आतंक मच्चाउन थालेपछि स्थानीयवासी त्रसित भएका छन् । गएराति मात्र जंगली हात्तीको आक्रमणबाट एकजना घाइते भएका छन् भने दर्जनौँ घर हात्तीले भत्काइदिएको छ । जंगली हात्तीले सर्वसाधारण नागरिकको घर भत्काइदिएको छ भने बालीसमेत खाई कुल्ची नष्ट गरेको बताइएको छ ।

हात्तीको आक्रमणबाट सलदेव मगरदैता गम्भीर घाइते भएका छन् । घाइते मगरदैताको विराटनगरस्थित गोल्डेन अस्पतालमा उपचार भइरहेको छ । मगरदैत्ताको अवस्था चिन्ताजनक रहेको बताइएको छ । हात्तीले स्थानीयवासी गोनर भुसकुलिया, रामचन्द्र मुखिया, सतेन्द्र मुखिया लगायतका घरमा क्षति पुर्‍याएको छ भने केही स्थानीयवासीको तरकारी बालीमा नोक्सानी गरेको छ ।

कोशी टप्पु वन्यजन्तु आरक्षको अर्ना र हात्तीको आतंकबाट बर्षेनि लाखौँको धनमाल र बालीमा क्षति भइरहेको छ भने चारदेखि सातजना व्यक्तिको ज्यान जाने गरेको कोशी टप्पु मध्यवर्ती क्षेत्र व्यवस्थापन समितिका अध्यक्ष वीरेन्द्र यादवले जानकारी दिए ।

अध्यक्ष यादवका अनुसार कोशी टप्पुमा प्रत्येक वर्ष जंगली जनावरको आक्रमणबाट बालीनाली, घर सहितको भौतिक संरचना र मानवीय क्षति भइरहेको छ । कोशी टप्पुको क्षेत्रमा पर्ने कोशी गाउँपालिकाको पश्चिम कुशाहा, लौकही, श्रीपुर, हरिपुर र भाण्टाबारी तथा बराहा क्षेत्र नगरपालिकाको मधुवन, प्रकाशपुर र महेन्द्रनगर क्षेत्रमा समेत जंगली हात्ती, अर्ना र बँदेलको आतंक रहेको स्थानीयवासीले बताएका छन् ।

जंगली जनावरको आतंक र आक्रमणबाट कोशी क्षेत्रका अधिकांश स्थानीयवासी राति जाग्राम बस्न बाध्य रहेको मधुवनका बिएल चौधरीले बताए ।

यस क्षेत्रमा ४ वर्षअगाडि लगाइएको सोलार फेन्स (विद्युतीय बार) ले समेत काम गर्न छोडेपछि जंगली जनावरको आतंक तीव्ररुपमा बढेको स्थानीयवासी कलिम मियाँले बताए ।

सांसदका लागि अभिमुखीकरण

काठमाडौँ, जेठ २३ गते । संसदीय प्रक्रियाका विषयमा सांसदहरूलाई जानकारी दिने उद्देश्यले संघीय संसद् सचिवालयले संघीय संसद्का सदस्यहरूलाई दुई दिने अभिमुखीकरण कार्यक्रमको आयोजना गर्ने भएको छ ।
सचिवालयले बुधबार र विहीबार विषय विज्ञबाट सांसद्हरूलाई विषयगत समितिको प्रस्तुतिदेखि कानुन निर्माणको प्रक्रियाबारे जानकारी दिन लागेको हो ।
संघीय संसद्का सदस्यलाई पहिलोपटक विषयगत ज्ञानबारे प्रशिक्षण दिन लागिएको हो । यसअघि संविधानसभामा सभासद्लाई क्षमता अभिवृद्धिका कार्यक्रम सञ्चालन गरिएको थियो ।
संघीय संसद् सविचलायका प्रवक्ता भरतराज गौतमले दुबै सदनका सबै सदस्यहरूलाई विषयगतरूपमा काम कारबाहीमा सहज होस् भनेर अभिमुखीकरण कार्यक्रम राखिएको बताउनुभयो । संघीय संसद्का ३३४ सदस्यकै लागि अभिमुखीकरण आयोजना गरिनेछ ।

नारायणगढ—मुग्लिन सडक दिउँसो बन्द नहुने..

चितवन, जेठ २३ गते । नारायणगढ–मुग्लिन सडकखण्डको पूरै भागमा कालोपत्र गर्ने कार्य सम्पन्न भएको छ ।

नारायणगढ—मुग्लिन सडक आयोजनाका सूचना अधिकारी ईन्जिनियर शिव खनालका अनुसार मंगलबार राति १२ बजे सो सडकको ३३ दशमलब २ किलोमिटरमा पहिलो तहको कालोपत्र गर्ने कार्य सम्पन्न भएको हो ।

यससँगै दैनिक बिहान १० देखि दिउँसो ४ बजेसम्म सवारी रोकेर काम गरिँदै आएकोमा आजदेखि सवारी नरोकिने खनालले बताउनुभयो । उहाँका अनुसार दोस्रो तह ३२ दशमलब ७ किलोमिटर र तेस्रो तह १२ दशमलब ७ किलोमिटर कालोपत्र गरिएको छ । पहिलो र दोस्रो तहमा ६÷६ सेन्टिमिटर र तेस्रो तह चार सेन्टिमिटर बाक्लो हुनेछ । उच्च स्तरको कालोपत्र भएकाले पहिलो तह सम्पन्न भएसँँगै पहिरोबाहेक अन्य जोखिमबाट सडक मुक्त भएको हो ।

सो सडकलाई तीन भागमा विभाजन गरेर काम गरिएको छ । पहिलो खण्ड आँपटारीदेखि दासढुंगा सम्मको १० दशमलब ४५ किलोमिटरको ठेक्का पाएको बीएलए श्रेष्ठ जेभिको पहिलो र दोस्रो तह पूरै कालोपत्र भइसकेको छ भने तेस्रो तहको दुई किलोमिटर कालोपत्रे भएको छ । सो सडक खण्डको कालोपत्र र सडक सुरक्षाको काम मात्रै बाँकी रहेको खनालले बताउनुभयो ।

दोस्रो खण्ड दासढुंगादेखि सिमलताल सम्मको १० दशमलव ६९ किलोमिटर सडकको अधिकांश काम सम्पन्न भएको छ । सो खण्डमा उड्हिल लामा जेभीले निर्माणको जिम्मा पाएको थियो । सो खण्डको प्रगति ९७ दशमलब ५० प्रतिशत भएको छ । एक वर्षसम्म काम हेर्नु पर्ने भएकाले प्रगति शत्प्रतिशत हुन एक वर्ष कुर्नुपर्ने हुन्छ ।

तेस्रो खण्ड सिमलतालदेखि मुग्लिन सम्मको १२ दशमलब १५ किलोमिटर हो । सो खण्डको प्रगति ८५ प्रतिशत भएको सूचना अधिकारी खनालले बताउनुभयो । सो खण्डको दोस्रो तह ११ दशमलब ८० किलोमिटर सम्पन्न भएको छ भने तेस्रो खण्ड पूरै बाँकी रहेको छ । तेस्रो खण्डमा कालोपत्र, रोड एङ्करिङ् र सडक सुरक्षाको काम बाँकी रहेको खनालले बताउनुभयो । मौसम अनुकूल भएमा एक दिनमा दोस्रो र तेस्रो तहको कालोपत्र एक किलोमिटर गर्न सकिने भएकाले लामो समय नलाग्ने उहाँले बताउनुभयो ।

चौथो पटकको मिति थपअनुसार पहिलो खण्डको मई १० मा म्याद सकिएको छ भने दोस्रो खण्डको २० मई र तेस्रो खण्डको ३० मई २०१८ मा सकिएको छ । हालसम्म सो सडकको समग्र प्रगति ९१ दशमलव पाँच प्रतिशत भएको छ । काम बाँकी रहेकाले समय थप गर्ने प्रक्रिया अघि बढाइएको छ ।

सो सडक सन् २०१५ को अप्रिलमा २४ महिनामा सक्ने गरी ठेक्का दिइएको थियो । लगत्तै गएको भूकम्प, नाकाबन्दी र दुई वर्षसम्म बर्सात् बढी भएका कारण समय थप गरिँदै आएको छ । कालोपत्र गर्ने काम सम्पन्न भएसँगै पहिरो झर्ने र गाडी बिग्रिने नभएमा एक घण्टा भित्रमा सो सडक पार गर्न सकिने जिल्ला ट्राफिक प्रहरी कार्यालय, चितवनका प्रमुख सन्तोष पन्तले बताउनुभयो ।

धमाधम सम्पादनमा “नयाँ बाटो”

काठमाडौं । नेपाली कलाकारिता क्षेत्रमा एउटा बिधा अंगालेर प्रवेश गरेका व्यक्तिहरुले विधा थप्ने वा परिवर्तन गर्ने परम्परा बसि रहेको छ । यस्तै नृत्य निर्देशन गर्दा गर्दै पहिलो पटक निर्देशनमा समेत हात हालेका सागर लामा गोलेको निर्देशन रहेको चलचित्र “नयाँ बाटो (छार ग्यालम्)” को सम्पूर्ण छायाँकन सकिएको छ । छायाँकन समाप्त भएसँगै उक्त चलचित्रको सम्पादन सुरु गरिएको छ ।’

कोशीपारी फिल्मस् प्रा.लि.को ब्यानरमा निर्माण गरिएको उक्त चलचित्रमा कुमार मोक्तान, सुनिता लुङ्बा, राहुल मोक्तान, सुनिता दोङ, लक्ष्मण बस्नेत, हस्त बहादुर गोले, धुर्व सिंह तामाङ (छिरिङ) सुर्य बहादुर गोले, गोकुल तामाङ, दीपा वाईबा लगायतका कलाकारहरुले अभिनय गरेका छन् भने बुद्ध स्याङ्बा, प्रयास दोङ र सुदिप न्यासुरको संगीत, राजु किराँतको द्वन्द, निर्देशक सागर स्वयमको नृत्य तथा तुलसी बाँस्कोटाको सम्पादन रहेको छ ।

तामाङ संस्कार तथा संस्कृति बोकेर तामाङ तथा नेपाली दुवै भाषामा डबिङ गरेर हलमा प्रदर्शन गरिने जानकारी चलचित्र “नयाँ बाटो (छार ग्यालम्)” का निर्देशक सागर लामा गोलेले जानकारी दिएका छन् । यस चलचित्रलाई सामाजिक कथा तथा एक्सन, कमेडी एवम साँगीतिक हरेक पक्षमा दमदार तरिकाले निर्माण गरिएकको दाबी समेत उनले गरेका छन् ।

जथाभावी फोहर फाल्ने सरकारी कार्यालयलाई चेतावनी

काठमाडौँ, जेठ २३ गते । वन तथा वातावरण मन्त्रालयले आज पनि राजधानीमा सरसफाइ कार्यक्रमलाई निरन्तरता दिएको छ ।

सयौँ संख्यामा स्वयंसेवक सहभागी सरसफाइ कार्यक्रम टुँडिखेलबाट शुरु भएर भद्रकाली, सिंहदरबार पश्चिमतर्फ, माइतीघर, बबरमहल, नेपाल आयल निगम हुँदै अन्नपूर्ण न्यूरो अस्पताल अगाडि पुगेर समापन गरियो ।

‘वि लभ यु फाउण्डेशन’ संस्थाको आयोजना गरिएको सरसफाइ कार्यक्रमको वन तथा वातावरण मन्त्री शक्तिबहादुर बस्नेतले नेतृत्व गर्नुभएको थियो । उहाँ मुखमा माक्स र हातमा कुचो लिएर सरसफाइमा सहभागी हुनुभएको थियो ।

सरसफाइका क्रममा राष्ट्रिय वाणिज्य बैंकको केन्द्रीय कार्यालय र राष्ट्रिय बीमा संस्थान अगाडि फोहरको थुप्रो देखेपछि मन्त्री बस्नेतले दुवै कार्यालयका कर्मचारी बोलाएर तत्काल फोहर हटाउन निर्देशन दिनुभयो ।

उहाँले भन्नुभयो, “तपाईहरुले आफ्नो कार्यालय अगाडि थुपार्नुभएको फोहर तत्काल हटाउनुस्, आगामी दिनमा पुनः यस्तो फेला पारियो भने कारबाही गर्छु ।” उहाँले कार्यालय अगाडि फोहर जम्मा पार्ने सरकारी कार्यालयलाई पहिलो चरणमा उक्त फोहर हटाएर आउँदा दिनमा त्यसो नगर्न निर्देशन दिने र निर्देशन पालना नभएमा जरिवाना लगाउने स्पष्ट गर्नुभयो ।

सिंदरबारभित्र र बाहिरका चमेना गृहले फोहर व्यवस्थापन गर्ने नगरेको पाइएपछि मन्त्री बस्नेतले तत्काल उक्त कार्य रोक्न निर्देशन दिनुभयो । मन्त्रालयले विश्व वातावरण दिवसका अवसरमा मंगलबारदेखि नेपाल स्वच्छ वातावरण महाभियानको थालनी गरेको छ ।

मन्त्री बस्नेतले महाभियानलाई शहरी क्षेत्रमात्र नभई गाउँगाउँसम्म पु¥याउने जानकारी गराउनुभयो । उहाँले स्वच्छ वातावरण निर्माणका लागि सरकारले चालेको कदममा साथ दिन आम नागरिकलाई अपिल गर्नुभयो ।