नेपाली मूर्तिकारद्वारा जापानमा १८ मिटर अग्लो बुद्धको मूर्ति बनाउँदै

चितवन, १३ असोज
नेपालका प्रसिद्ध मूर्तिकारहरुको टोलीले जापानको क्युसुको कुमामोतोमा १८ मिटर अग्लो मूर्ति बनाउने काम थालेका छन् । नेपालका प्रसिद्ध मूर्तिकार सूर्य ‘मध्यरात’ (चितवन), मञ्जुल ‘मितेरी’ (मोरङ), रामचन्द्र पण्डित (उदयपुर) र सानुभाइ विश्वकर्मा (काभ्रेपलाञ्चोक) ले सो १८ मिटर अग्लो बुद्धको मूर्ति बनाउन थालेका छन् । जापानका व्यवसायी तथा समाजसेवी ओओसिमाको लगानीमा निर्माण हुन लागेको सो मूर्ति पाँच वर्षमा निर्माण सम्पन्न हुने प्रोजेक्ट मेनेजर दिलिप लामिछानेले जानकारी दिए ।

४ वर्ष देखि जापानमा अध्ययनरत विद्यार्थी दिलिप लामिछाने मार्फत् सो मूर्तिकारहरु जापान गएका हुन् । करिब ५० अरब भन्दा बढी रकम लाग्ने प्रारम्भिक अनुमान गरिएको सो मूर्ति निर्माणमा आवश्यक पर्ने रकम समाजसेवी ओओसिमाले खर्च गर्ने लामिछानेले जानकारी दिए । सो १८ मिटरको मूर्तिका साथै १३ मिटरको दुईवटा र ८ मिटरको चारवटा मूर्ति समेत निर्माण हुने लामिछानेले जानकारी दिए ।

आफ्नो जन्मस्थलमा केही सामाजिक गरौं भन्ने भावनाका साथ सो कुमामोतो राज्यमा ओओसिमाले बुद्धको मूर्ति निर्माण गर्न लागेका हुन् । चितवनका दिपक लामिछानेको सहयोगमा मूर्तिकारहरु जापान पुगेका हुन् । जापान पुगेका मूर्तिकारहरुलाई फुकुओका र कुमामोतो राज्यमा भव्य स्वागत समेत गरिएको थियो । २१औं शताब्दीको नयाँ सम्पदाको रुपमा विकास गरिने सो स्थानमा बुद्धको मूर्ति बन्न लागेपछि सो राज्यका जापानीहरु र नेपाली समुदायहरु हर्षित भएका छन् । चितवनका प्रसिद्ध मूर्तिकार सूर्य ‘मध्यरात’ लगायतका मूर्तिकारहरु नेपालकै प्रख्यात मूर्तिकार हुन् । उनीहरुले बनाएका मूर्तिहरु नेपाल र नेपालीहरु माझ ज्यादै लोकप्रिय रहेका छन् ।