शिशिर सिंखडा
रत्ननगर, चितवन, १७ माघ ।
नेपाल यातायात व्यवसायी राष्ट्रिय महासंघको पाँचौ महाधिवेशन आज बुधबारबाट चितवनको रत्ननगरमा शुरु भएको छ । महाधिवेशनको उद्घाटन गर्दै प्रमुख अतिथि उपराष्ट्रपति नन्द बहादुर पुनले देशको हरेक जिल्ला र गाउँ सडक यातायातले जोडिएको भन्दै देशमा अन्य यातायात भन्दा सडक यातायात महत्वपूर्ण रहेको र यसको विकल्प समेत नरहेको बताएका छन् ।
हवाई यातायात महंगो र जल यातायातको सम्भावना कम भएकोले सडक यातायातको देशमा विकल्प नभएको भन्दै यसलाई व्यवस्थित बनाउन निजी क्षेत्र र सरकार लाग्नुपर्ने बताए । रु. ५ खरबको लगानी रहेको यातायात क्षेत्रमा २० लाख नेपालीले प्रत्यक्ष रोजगार पाएको भन्दै उपराष्ट्रपति पुनले सार्वजनिक यातायात क्षेत्र उद्योगको रुपमै रहेको समेत बताए ।
देशमा स्थानीय, प्रदेश र प्रतिनिधि सभाको निर्वाचन भई संविधान कार्यान्वयनको अवस्थामा रहेको भन्दै पुनले अब देश आर्थिक समृद्धि तर्फ अगाडि बढेको समेत बताए । देशको आर्थिक विकासको लागि निजी क्षेत्र र त्यसमा पनि यातायात क्षेत्रको महत्वपूर्ण भूमिका रहेको समेत उनले बताए ।
कार्यक्रममा भौतिक पूर्वाधार तथा यातायात राज्य मन्त्री सिता गुरुङ्ग, पूर्व मन्त्रीहरु मुकुन्द न्यौपाने, बालकृष्ण खाँड, लेखराज भट्ट, अखिल नेपाल ट्रेड महासंघका केन्द्रीय अध्यक्ष गणेश रेग्मी, नेपाल यातायात स्वतन्त्र मजदुर संगठनका केन्द्रीय अध्यक्ष भीम ज्वाला राई, नेपाल यातायात मजदुर संघका केन्द्रीय अध्यक्ष अजय राई, अखिल नेपाल यातायात मजदुर संगठनका केन्द्रीय अध्यक्ष सोम तमाङ, महासंघका केन्द्रीय सल्लाहकार संयोजक योगन्द्रनाथ कर्माचार्य लगायतले कार्यक्रममा मन्तव्य व्यक्त गरेका थिए ।
यहि माघ १९ गते शुक्रबारसम्म हुने पाँचौ महाधिवेशनबाट महासंघको ८३ सदस्यीय केन्द्रीय कमिटीको चयन हुनेछ । देशभरका करिब ३ सय संघ, समिति र प्रा.लि. ले देशभर यातायात संचालन गरिरहेका छन् । सो यातायात व्यवसायीहरु मध्येबाट प्रतिनिधिमूलक रुपमा २ हजार ३ सय प्रतिनिधिले महाधिवेशनमा सहभागीता जनाएका छन् । प्रतिनिधिहरुले नयाँ नेतृत्व चयनका साथै यातायात क्षेत्रको विकासको लागि घोषणा पत्र समेत जारी गर्ने महासंघका महासचिव सरोज सिटौलाले जानकारी दिए ।
No comments:
Post a Comment