काठमाडौं, १६ जेठ । प्रधानमन्त्री केपी शर्मा ओलीले वर्तमान सरकारले जनताको भरोसालाई तलमाथि पर्न नदिने बताएका छन् । नेपाल राष्ट्रिय शिक्षक संगठनको १२ औं महाधिवेशनको बुधबार उद्घाटन गर्दै प्रधानमन्त्री ओलीले भने, ‘जनताको लागि यो सरकार अन्तिम आशा हो । जनताको यो आशालाई तलमाथि पर्न दिइदैन । हामी भ्रष्ट भए सदाचार कहाँ पाइएला ? त्यसकारण सदाचार भएर देश बनाउन सबै लाग्नु पर्दछ ।’
प्रधानमन्त्री ओलीले बालबालिकालाई असफल गराएर सरकार र शिक्षा प्रणालीले अपराध गरिरहेको बताए । प्रधानमन्त्री ओलीले हरेक बालबालिकामा फरक फरक खालका क्षमता हुने तर शिक्षाले सैद्धान्तिक ज्ञानलाई मात्र मान्यता दिने नाममा बच्चालाई असफल गराएर ठूलो अन्याय गरेको बताए ।
‘असाधरण क्षमता भएका साना नानीहरुलाई हामी फेल बनाएर उनीहरुको हृदयमा बन्चरो हानिरहेका छौं’, प्रधानमन्त्री ओलीले भने, ‘ती बच्चाहरु फेल होइन सरकार, शिक्षक, विद्यालय, पाठ्यक्रम र शिक्षा प्रणाली फेल हो ।’
बच्चाहरुको क्षमता पहिचान गरेर रुचीको विधामा उनीहरुलाई सिक्ने अवसर प्रदान गर्नुपर्ने प्रधानमन्त्री ओलीको भनाइ छ । प्रधानमन्त्री ओलीले सरकारी विद्यालयको नतिजा सन्तोषजनक नरहेको बताए ।
शिक्षकहरुलाई नतिजा सुधार्नका लागि कक्षा कोठामा प्रविधिको प्रयोग र शिक्षकहरुलाई अध्ययन गर्ने बानी बसाउन आग्रह गरेका छन् । अस्थायी शिक्षकका समस्या समाधान गर्न पनि सरकार गम्भिर भएकोे प्रधानमन्त्री ओलीको भनाइ छ ।
‘पढाउन नजान्ने शिक्षक राखेर हँदैन’, प्रधानमन्त्री ओलीले भने, ‘सबै शिक्षकहरुले आफूले पढाउने बिषयमा दक्षता हासिल गर्नुहोस । बिषयवस्तुको ज्ञान शिक्षकलाई नै छैन भने कसरी पढाउनुहुन्छ ?’
प्रधानमन्त्री ओलीले शैक्षिक प्रमाणपत्र लिएर केही पनि नजान्ने र रोजगार पनि नपाउने अवश्थाको अन्त्य हुनुपर्ने बताए । ‘शिक्षालाई आधुनिक, प्रतिष्पर्धी, विकास र रोजगारसँग जोडिएको बनाउनु पर्दछ’, प्रधानमन्त्री ओलीले भने ।
No comments:
Post a Comment