फलेवास (पर्वत), १२ कात्तिक । बैंकमार्फत सामाजिक सुरक्षा भत्ता वितरण गर्न थालिएपछि पर्वतमा रु एक करोड ५० लाखभन्दा बढी रकम फिर्ता भएको छ ।
जिविसले गत आवदेखि बैंकमार्फत सामाजिक सुरक्षा भत्ता वितरण गर्न थालेको थियो । बैंकबाट वितरण गर्नुपूर्व गाविसका सचिवहरुले फर्जी नाम राखेर करोडौँ रुपैयाँ दुरुपयोग गर्ने गरेको समेत खुलासा भएको छ ।
एउटै गाविस सचिवले एकदेखि ३०० जनासम्मको फर्जी नाम राखेर सामाजिक सुरक्षा भत्ताको रकम दुरुपयोग गर्ने गरेको पाइएको हो । जिल्लाका एक नगरपालिकासहित ४२ वटा गाविसमा सामाजिक सुरक्षा भत्ता पाउनेलाई बैंकमार्फत भत्ता वितरण गर्न थालिएपछि रु एक करोड ५९ लाख फिर्ता भएको जिविसले जनाएको छ ।
जिविसका सामाजिक सुरक्षा कार्यक्रम प्रमुख लीलाधर सुवेदीका अनुसार गाविसका सचिवहरुले दिएको नामावलीअनुसार बैंकमा भत्ता बुझ्न नआएका कारण उक्त रकम जिविसमै फिर्ता भएको हो । यसअघि उक्त रकम गाविस सचिवहरुले दुरुपयोग गर्दै आएका थिए ।
गाविस सचिवहरुले उपलब्ध गराएका नामावलीअनुसार पर्वतमा दलित ज्येष्ठ नागरिक तीन हजार ३५६, अन्य ज्येष्ठ नागरिक सात हजार १२४, एकल महिला ६० वर्ष मुनिका दुई हजार ९०८, ६० वर्ष माथिका एकल महिला तीन हजार १८५, पूर्ण अपाङ्ग २०१, आंशिक अपाङ्ग ७४ जना र बालबालिका पाँच हजार ६५८ जनाका गरी २२ हजार ५०६ जनालाई जिविसबाट रकम निकासा भएको थियो ।
कुल रु ११ करोड ५६ लाख ९५ हजार ६०० निकासा भएकामा रु एक करोड ५९ लाख फिर्ता भएको सुवेदीले जानकारी दिनुभयो । गाविसका सचिवहरुले नै फर्जी नामावली दिएर रकम बुझ्ने गरेका कारण यति ठूलो सङ्ख्यामा रकम फिर्ता भएको सुवेदीले बताउनुभयो ।
अहिले जिविस पर्वतले सदरमुकाममा दुई, फलेवासमा एक, कार्कीनेटामा एक, हुवासमा १ र म्याग्दीमा रहेको बैंकबाट जिल्लामा एक नगरपालिकासहित ४२ वटा गाविसका बासिन्दालाई भत्ता वितरण गर्ने व्यवस्था मिलाएको छ ।
राष्ट्रिय वाणिज्य बैंक, गरिमा विकास बैंक, मुक्तिनाथ विकास बैंक, देव विकास बैंकलगायतका विभिन्न बैंकका शाखाबाट गत आवदेखि नै भत्ता वितरण गरेपछि सामाजिक सुरक्षा भत्ता बुझ्नेसमेत लाभान्वित बनेका छन् भने रकमको दुरुपयोग हुनबाट समेत जोगिएको जिविसका सूचना अधिकृत तुलसीराम शर्माले जानकारी दिनुभयो । उहाँका अनुसार अझै रकम फिर्ता हुने क्रम बाँकी रहेको छ ।
गाविस सचिवहरुले वृद्धवृद्धाको नामावलीसमेत अद्यावधिक नगर्ने र फर्जी नामहरु राखेर आफँै औँठाछाप तथा खुट्टाको बुढीऔँलाको छापसमेत लगाएर रकम बुझ्ने गरेका थिए । सामाजिक सुरक्षा भत्तामा अनियमितता भएको समाचारहरु आएपछि कतिपय गाविस सचिवहरु भने अख्तियारको फन्दामा समेत परिसकेका छन् ।
एउटै गाविसमा ठूलो रकम जाने तर फिर्ता नहुने भएपछि जिविसले समेत कडाइ गरेको थियो । रकम दुरुपयोग हुनबाट जोगाउन र पारदर्शिता कायम गर्नका लागि जिविसले बैंकमार्फत वितरण गर्न थालेपछि सामाजिक सुरक्षा भत्ता प्रभावकारी बनेको बैंकहरुले जनाएका छन् ।
बैंकमार्फत वितरण प्रक्रियालाई अझै सहज बनाउनका लागि पनि पहल भइरहेको जिविसका सामाजिक सुरक्षा कार्यक्रम प्रमुख लीलाधर सुवेदीले जानकारी दिनुभयो । उहाँका अनुसार एउटै गाविसलाई धेरैवटा बैंकको जिम्मेवारीलाई कम गरी अरु बैंकलाई पनि सामाजिक सुरक्षा भत्ता वितरणको जिम्मेवारी दिने तयारी भइरहेको छ ।
No comments:
Post a Comment