वाम गठबन्धनलाई कलाकारको पनि साथ, “यो चितवनको ठाम, वामपन्थीलाई माया गर्ने गाम”–गायक हरि योञ्जन

शिशिर सिंखडा
भरतपुर, चितवन ।
“यो चितवनको ठाम, वामपन्थीलाई माया गर्ने गाम”
“चारैतिर वामै वाम, नाच छम छम”

जव राष्ट्रिय कलाकार गायक हरि योञ्जनले यो गीत गाउन शुरु गरे तव पूर्वी चितवनको कालिका नगरपालिकाको सिद्धि क्षेत्रका सयौं स्थानीयवासी सँगै गीत गाउँदै नाच्दै थिए । जव जव हरि योञ्जनले माइक्रोफोन समाउँदथे तव तव तालीको गडगडाहट शुरु भैहाल्थ्यो । गीत सँगसँगै गायक योञ्जनले देशको विकास र परिवर्तनको लागि वाम गठबन्धनले जित्छ हैन त ? भनेर प्रश्न समेत गर्दथे । सयौं दर्शकहरुले ठुलो स्वरमा भन्थे, चितवनमा वाम नबै ठाम ।

“यो सिद्धिको गाम, कम्युनिष्टलाई मनपराउने ठाम
चारैतिर वामै वाम, नाच छम छम
यो सिद्धिको गाम, यो चेपाङको गाम
कम्युनिष्टलाई मनपराउने ठाम
चारैतिर वामै वाम, नाच छम छम”

वाम गठबन्धन चितवनको क्षेत्र नं. २ प्रतिनिधि सभाका उम्मेदवार कृष्णभक्त पोखरेल र प्रदेश सभा चितवन क्षेत्र नं. २ “क” का उम्मेदवार घनश्याम दाहाल सहित कार्यकताहरु मतदाता भेटघाट तथा घरदैलो गर्दै शक्तिखोर, चिसापनी हुँदै सिद्धिसम्म विभिन्न स्थानमा कोणसभा समेत गर्दै पुगेका सबैलाई जब गायक योञ्जनले सम्बोधन गरी गीत गाए तव के वृद्ध, के युवा सबैले ताली बजाउँदै नाच्न थाले र पैदल हिडाईको थकाई समेत बिर्साइ दिएका थिए ।  देशैभरीका जनताले अब वामपन्थीको सरकार आएको हेर्न आतुर रहेको भन्दै राष्ट्रिय कलाकार योञ्जनले –

“एउटै मुटु बनिसके प्रचण्ड र ओली
ओली अलि कडा छन् है चुनाव आयो भोली
वामपन्थीलाई सबैले भोट खसाउने अरे
दुई तिहाईको सरकारनी बनाउने अरे”
त्यस्तै उनले आफ्ना हितैषी साथी जनगायक खुशीराम पाख्रिनलाई सम्झदै –
“अहिंसाको लडाईमा, सन्देश छर्न जादैछौ आमा
धरोधर्म तिम्रो कसम, खादैछौ आमा”

गीत गाएर उम्मेदवार एवम् सबै दर्शकहरुलाई भावुक समेत बनाएका थिए । गायक योञ्जनलाई स्थानीय कलाकार गोविन्द बहादुर विश्वकर्माले पनि साथ दिए । सोही कार्यक्रममा गायक विश्वकर्माले –

“छरिएको केन्द्र र एमाले
प्रचण्ड र केपीले सम्हाले
जनता जागे है, जनता जागे है
वाम गठबन्धन जिताउन
गाउँ शहर लागे है
विपक्षी हटाएर, विपक्षी हटाएर
यही मंसिर महिनामा वामपन्थी सरकार”
सोही कार्यक्रममा स्थानीय गायिक अनिता वि.क.ले –
“वामरी म भरे गैहाल्छु
भोट हालौ सबैले चुनावमा रामरी”
भन्ने गीत समेत गाएकी थिइन् । त्यस्तै अर्का कलाकार रमेश योञ्जन पनि के कम, उनले पनि –
“हुर्केका छोरा क्रान्तिमा लाग्यो भनेर सम्झिनु
सम्झेर मुटु भक्कानो फुट्दा कठोर भईदिनु”

गीत गाएका थिए । गायक हरि योञ्जन मात्र होइन, राष्ट्रिय कलाकारहरु यतिखेर वामपन्थी गठबन्धनलाई विजयी गराई देशको विकास र आर्थिक समृद्धि तर्फ लम्कन अनुरोध गर्दै बद्रि पगेनी, मनोज गजुरेल, चेतन सापकोटा लगायतका कलाकारहरु वाम गठबन्धनका उम्मेदवार चितवन क्षेत्र नं. ३ प्रतिनिधि सभा सदस्य पुष्पकमल दाहालको क्षेत्रमा समेत खटिएका छन् ।